Kryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati sot në një konferencë për media tha OVL e UÇK-së kërkon nga deputetët e Kosovës shkarkimin e Dimal Bashkës nga pozita e kryetarit të Kuvendit.
Gucati tha se OVL e UÇK-së kërkon po ashtu nisjen e hetimeve nga Prokuroria e Shtetit.
“Arsyeja për fillimin e hetimeve dihen, pjesëmarrja në luftë speciale propagandistike kundër UÇK-së dhe Republikës së Kosovës si dhe lidhja personale dhe bashkëpunimi me persona të dyshimtë, përfshirë bashkëpunëtorë nga Maqedonia e Veriut të cilët ndikojnë negativisht në zhvillimin dhe integritetin e vendit tonë”, tha ai, raporton Telegrafi.
OVL e UÇK-së kërkoi përgjegjësi të plotë dhe veprime të menjëhershme nga autoritetet për mbrojtjen siç thanë të së vërtetës dhe nderin e luftës së UÇK-së, ndërkaq tha se nëse nuk iu përfillen kërkesat atëherë obligohen të ndërmarrin veprime tjera.
Tutje, Gucati tha se në LVV ka edhe dëshmitarë në Gjykatën Speciale.
“..Tu e marr prej Donika Gërvallës që ka dorëzuar dokumentacione në atë kohë e që vet e ka pranu, të tjerët që do të dalin të gjithë me emra dhe më nuk do të fshehim asgjë nga askush se s’kemi frikë…Dimal Basha me kategoritë e dala nga lufta do të dalë humbës…”, tha ai.
Gucati deklaroi po ashtu se Basha nuk mund t’i ikë përgjegjësisë me një deklaratë. Kryetari i OVLUÇK-së tha se Basha nuk i ka dyert e hapura në këtë organizatë.
“Njerëzit dhe soji i Bashës nuk i kanë dyert e hapura, ata mund t’i kenë të hapura në Serbi, por jo në zyrat tona…”, tha ai.
Ndryshe, kryetari i ri i Kuvendit të Kosovës, Dimal Basha, sot gjatë ditës ka reaguar pas publikimeve në media që lidhen me një punim akademik të tij të vitit 2012.
Në këtë punim në të cilën Dimal Basha është bashkëautor me Jana Arsovska, profesoreshë në Kolegjin e Drejtësisë Penale “John Jay”, thuhet se UÇK-ja kishte bashkëpunuar me kriminelë brenda dhe jashtë Kosovës, përfshirë paratë e drogës.
Basha tha se punimi është shkruar kur ai ishte student dhe se ai mban përgjegjësi vetëm për kapitullin III, i cili trajton depërtimin e Islamit fundamentalist në Evropën Juglindore, me fokus Kosovën.
Ai theksoi se autorësia e pjesës tjetër i përket vetëm autores, Jana Arsovska, e cila tashmë ka dërguar një email demantues, duke sqaruar se Basha dorëzoi për publikim vetëm kapitullin në fjalë. /Telegrafi/