Presidentja e Kosovës, Vjosa Osmani, ka thënë se në Kosovë nuk do të ketë kurrë më policë e ushtarë të Serbisë, disa orë pasi nga Beogradi erdhi kërcënimi për kthim të ushtrisë në territorin e Kosovës.
“Në territorin e Republikës së Kosovës kurrë më nuk do të ketë policë dhe ushtarë të Serbisë! Ëndrra hegjemoniste e Serbisë nuk do të jetësohet kurrë!” ka shkruar ajo.
Osmani ka shtuar se kërcënimi i hapur për agresion nga Serbia e dëshmon mendësinë që ka ekzistuar më 1999, teksa ka kërkuar reagimin ndërkombëtar për sjelljen e Beogradit.
“Kërcënimi i hapur për agresion policor e ushtarak nga ana e Serbisë dëshmon se në atë shtet vazhdon mendësia hegjemoniste. Kjo duhet të refuzohet e kundërshtohet qartë nga e gjithë bota demokratike, e cila i dha goditjen më të fuqishme kësaj mendësie pikërisht në vitin 1999”.
Presidentja e ka dënuar sulmin ndaj policisë të enjten dhe ka thënë se autorët e sulmeve që janë bërë në veri duhet të dalin para drejtësisë.
“Plagosja e mbrëmshme e një pjesëtari të Policisë së Kosovës është veprim kriminal dhe i orientuar kundër rendit kushtetues e sovranitetit të Kosovës si dhe kundër veprimeve për sundim të rendit e ligjit. Gjithashtu, sulmet ndaj gazetarëve përbëjnë cenim flagrant të të drejtës për informim të lirë. Autorët e këtyre krimeve, urgjentisht të sillen para drejtësisë, ndërkaq institucionet e drejtësisë duhet të veprojnë menjëherë”.
