Presidentja e Kosovës, Vjosa Osmani, priti sot në takim delegacionin e Komisionit për Politikë të Jashtme të Parlamentit të Portugalisë, i kryesuar nga kryetari i këtij komisioni, Sergio Souza Pinto, të cilin e falënderoi për mbështetjen e Portugalisë dhënë Kosovës.
Me delegacionin portugez presidentja Osmani diskutoi për raportet ndërshtetërore dhe mbështetjen e Portugalisë për sa i takon procesit të liberalizimit të vizave dhe anëtarësimit në Këshillin e Evropës.
Sipas presidentes, Komisioni Evropian ka rekomanduar heqjen e vizave për Kosovën, ngase Kosova i ka plotësuar të gjitha kriteret. Prandaj, sipas saj, vendimmarrja politike gjatë Presidencës Çeke është më se urgjente dhe hyrja në fuqi e liberalizimit të vizave nuk duhet të mbetet peng i asnjë teknikaliteti.
Presidentja më tej në takim më delegacionin portugez ka folur edhe për rëndësinë e pranimit të Kosovës në Këshillin e Evropës.
Sipas saj, anëtarësimi në këtë organizatë avancon liritë dhe të drejtat e njeriut. Në këtë kontekst, ajo falënderoi Portugalinë për mbështetjen e deritashme.
“Në takim u shfaq gatishmëria e dyanshme për shkëmbimin e përvojave dhe avancimin e bashkëpunimit ndërmjet të dyja parlamenteve, sikurse edhe në fushën e politikës së jashtme, mbrojtjes, arsimit, turizmit dhe sfera të tjera të interesit të përbashkët”, thuhet në komunikatën nga Presidenca. /Zëri