Presidentja e Kosovës, Vjosa Osmani, ka kërkuar zyrtarisht nga Qeveria e Kosovës që të pezullojë tarifat e importit për të gjitha produktet nga Shtetet e Bashkuara të Amerikës. Në një status në platformën X, Osmani e cilësoi këtë si një hap të rëndësishëm për forcimin e lidhjeve ekonomike me aleatin më të afërt të Kosovës.
Sipas saj, kjo lëvizje do të krijojë mundësi të reja për punësim, shkëmbim teknologjik dhe rritje ekonomike afatgjatë.
“Sot, i kërkova zyrtarisht Qeverisë së Kosovës të pezullojë tarifat e importit për të gjitha produktet amerikane—një hap i rëndësishëm për të thelluar lidhjet ekonomike me aleatin tonë më të afërt dhe për të dërguar një mesazh të qartë: Kosova është e gatshme për një marrëdhënie më të fortë me Shtetet e Bashkuara, me një vizion të qartë që do t’i bëjë të dyja vendet tona më të forta, më të sigurta dhe më të begata. Jam e bindur se ky hap do të hapë mundësi të reja për krijimin e vendeve të punës, shkëmbimin teknologjik dhe rritjen ekonomike afatgjatë. Më shumë se sa një veprim ekonomik, ky është një objektiv i politikës së jashtme, që riafirmon përkushtimin tonë të qëndrueshëm ndaj aleancës Kosovë–SHBA, e ndërtuar mbi vlerat e përbashkëta të lirisë dhe mbështetjes së palëkundur ndër dekada,” ka shkruar presidentja Osmani.
Mbrëmë presidenti amerikan, Donald Trump, ka shpallur një seri masash të reja tarifore, duke përfshirë një tarifë minimale prej 10% për të gjitha importet në SHBA. Pjesë e kësaj mase janë edhe Kosova dhe vendet e tjera të Ballkanit Perëndimor, të cilat do të ndikohen nga këto tarifa të reja.
