Deputetët e vetëvendosjes nuk po marrin pjesë në Kuvend në seancën e jashtëzakonshme të ftuar nga opozita për miratimin e rezolutës për mbështetje për Policinë e Kosovës.
Kryetarët e grupeve parlamentare të opozitës janë shprehur te indinjuar nga ky fakt.
Abelard Tahiri i PDK-së deklaroi se është e papranueshme mospjesëmarrja e mazhorancës, duke shtuar se është turp i madh, siç tha, që po i ikin mbështetjes që duhet t’i japin Policisë së Kosovës.
Turpëruese e vlerësoi edhe Armend Zemaj i LDK-së mungesën e deputetëve të LVV-së në seancën e sotme.
“Këtë sjellje po dëshiron dikush ta shndërrojë në normë e praktikë, por është praktikë e keqe dhe e mbrapshtë dhe nuk i kontribuon as zhvillimit demokratik e as zhvillimit të vendit, deklaroi ai.
Ndërkaq, Besnik Tahiri i AAK-së u shpreh se kuvendi sot nuk do të ishte dashur të diskutonte për diçka që i takon policisë.
“Nuk ka ndodhur në historinë e këtij shteti që qeveria t’ia ndalë shtesat e rrezikshmërisë policëve të Kosovës. U takon me ligj”, tha Tahiri.
