Organizata “EC Ma Ndryshe” ka realizuar sesione interaktive në shkollat “Gani Saramati”, “Emin Duraku” dhe “Xhevat Berisha” në Prizren me qëllim të përfshirjes së gjeneratave të reja në diskutimet dhe njohuritë mbi ndryshimet klimatike dhe ndikimin urbanistik.
Sipas njoftimit të kësaj organizate, këto aktivitete synojnë të rrisin ndërgjegjësimin e nxënësve për rëndësinë e zhvillimit të qëndrueshëm urban, veçanërisht për shfrytëzimin e përgjegjshëm dhe gjithëpërfshirës të hapësirave publike.
“Gjatë këtyre takimeve, nxënësit patën mundësi të informohen për sfidat që lidhen me ndryshimet klimatike dhe mënyrën se si planifikimi urban mund të kontribuojë në zbutjen e ndikimeve të tyre në komunitet. Përveç prezantimeve informuese, aktivitetet u shoqëruan edhe me ushtrime praktike dhe diskutime të hapura, përmes të cilave nxënësit reflektuan mbi sfidat që i shohin në mjedisin e tyre dhe paraqitën ide dhe propozime për zgjidhje të mundshme në të ardhmen” – thuhet në njoftim.
EC Ma Ndryshe thekson se këto sesione krijuan një hapësirë të rëndësishme për të dëgjuar perspektivën e të rinjve dhe për t’i përfshirë ata në proceset e mendimit kritik rreth zhvillimit të qëndrueshëm të qytetit, me përqendrim në hapësira publike më funksionale dhe gjithëpërfshirëse.
Siç bëhet e ditur, ky aktivitet është realizuar në kuadër të projektit “Public Spaces 4 All”, të zbatuar nga EC Ma Ndryshe, me mbështetje nga Qeveria Gjermane dhe Sekretariati Shtetëror i Zvicrës për Çështje Ekonomike (SECO), përmes GIZ Kosova.
Klikoni KËTU për tu bërë pjesë e kanalit të TV Prizreni në Youtube.
