OJQ “EC Ma Ndryshe” njofton se ka mbajtur një takim me banorët e lagjes “Jeta e Re” në Prizren në kuadër të projektit “Public Spaces 4 All”, ku të pranishëm kanë qenë edhe zyrtarë të DHSP-së nga Komuna e Prizrenit dhe ata nga KMM “Eko Regjioni” – Njësia në Prizren.
Sipas njoftimit, në këtë takim u diskutuan problemet kryesore që prekin komunitetin, si ndotja nga ndërtimet, mungesa e pastërtisë në rrugë, pikat ilegale të mbeturinave, trafiku dhe mungesa e shenjëzimit rrugor. Po ashtu, thuhet se u ngritën shqetësime për ndriçimin publik, mungesën e çerdhes, qentë endacakë dhe vështirësitë në lëvizje për të moshuarit, për shkak të mungesës së transportit urban brenda lagjes.
Siç bëhet e ditur, përfaqësuesit institucionalë ofruan sqarime mbi shërbimet ekzistuese dhe inkurajuan qytetarët që të raportojnë problemet përmes kanaleve zyrtare, si dhe të adresojnë kërkesat me shkrim për zgjidhje konkrete.
