Oda e Hotelierisë dhe Turizmit të Kosovës (OHTK) ka dalë kundër vendimit të Qeverisë së Kosovës për mbylljen e bizneseve të hotelerisë dhe të gastronomisë për këtë fundjavë, që është paraparë si masë parandaluese e përhapjes së COVID-19.
Në reagimin e OHTK-së thuhet se ky vendim është i ngutshëm dhe se është marrë pa ndonjë konsultim me ata, njofton Klan Kosova.
“Vendimet e tilla pa ndonjë analizë të terenit, jo vetëm që po shkaktojnë frikë dhe ankth tek qytetarët, por për sektorin e hotelierisë dhe gastronomisë po sjellin frikë dhe pasiguri duke u cilësuar si sektori më i diskriminuar dhe më pak i ndihmuari nga Qeveria që nga marsi kur edhe u krijua situata e pandemisë nga virusi COVID-19, e posa po alarmohet situata të parët që po atakohen janë hotelierët dhe gastronomët”.
“OHTK-ja ka dorëzuar manualin e përdorimit në Qeveri, ka dhënë sygjerim që të formohet një TASK forcë e përbashkët qeveri – biznese, ka bërë reagime të shumta dhe do të vazhdojë të reagojë, por siç po shihet kjo nuk po merret parasysh, andaj nëse situata vazhdon me ritëm të tillë, OHTK-ja nuk i përjashton edhe protestat”.
