Kanë nisur punimet restauruese në ndërtesën historike të Shkollës së Mesme të Ulët “Ryzhdije” në Prizren, një objekt me vlera të veçanta historike dhe kulturore, ndërtuar në vitin 1896.
Lajmin e ka bërë të ditur zëvendësministrja në detyrë e Kulturës dhe Turizmit, Nora Arapi Krasniqi, e cila ka ndarë edhe fotografi nga inspektimi i punimeve në terren.
Sipas saj, ndërtesa, e cila dëshmon historinë e arsimit publik në Prizren dhe që më vonë kishte shërbyer edhe si spital i përgjithshëm, kishte mbetur për vite të tëra e dëmtuar pas vërshimeve, braktisjes dhe zjarrit që e kishte përfshirë në vitin 1992.
Punimet restauruese financohen nga Ministria e Kulturës dhe Turizmit, ndërsa faza e parë ka nisur me pastrimin e hapësirës dhe përforcimin fillestar të strukturave të mureve. Më pas do të vazhdohet me zbatimin e projektit të restaurimit.
Gjatë vizitës në vendpunishte, zëvendësministrja Arapi Krasniqi, së bashku me përfaqësues të Qendrës Rajonale për Trashëgimi Kulturore në Prizren, inspektoi nga afër ecurinë e punimeve.
Ajo theksoi se restaurimi i kësaj ndërtese synon ruajtjen e trashëgimisë kulturore të Prizrenit dhe rikthimin në funksion të objekteve që dëshmojnë historinë dhe identitetin e qytetit.
