Të shtunën e 6 qershorit dyertë e 17 ambasadave dhe 13 konsullatave të Republikës së Kosovës do të hapen për të votuar të gjithë qytetarët e Kosovës që janë regjistruar për votim jashët vendit.
Nesër, saktësisht në orën 07:00 të mëngjesit, ambasada e Republikës së Kosovës në Ankara dhe konsullata në Stamboll do të jenë përfaqësitë e para diplomatike që do të hapin dyert për të pritur për votim 182 votuesit e regjistruar paraprakisht.
Pas Turqisë, procesi i votimit për zgjedhjet e parakohshme për Kuvendin e Kosovës do të vazhdojë në 15 shtetet e Europës, ku janë regjistruar 26,230 votuesit tjerë, si: Gjermani (13,319), Zvicër (5,078), Mbretëri e Bashkuar (1,395), Belgjikë (1,268), Francë (1,187), Austri (1,125), Slloveni (717), Norvegji (691), Itali (338), Suedi (280), Danimarkë (260), Holandë (174), Kroaci (171), Hungari (134) dhe Republika Çeke (93).
Hapi final i këtij procesi do të zhvillohet përtej Atlantikut. Për 1,312 votuesit që jetojnë në ShBA dhe Kanada, qendrat e votimit do të jenë të hapura në katër qendra të mëdha: Uashington, Nju Jork, Otavë dhe Toronto.
Zëdhënësi i KQZ-së, Valmir Elezi, ka treguar për KosovaPress se do hapen 47 vendvotime në qendrat e votimit në 30 përfaqësitë diplomatike të shtetit të Kosovës për të mundësuar votimin e më shumë se 27 mijë shtetasve të Kosovës.
“Më 6 qershor, procesi i votimit në zgjedhjet për Kuvendin e Kosovës do të zhvillohet në 17 ambasada dhe 13 konsullata, të vendosura në 18 shtete të ndryshme të botës. Nga 132,212 votuesit jashtë Kosovës, të drejtë vote në këto përfaqësi diplomatike kanë vetëm 27,724 shtetas të Kosovës, të cilët janë regjistruar paraprakisht dhe kanë përzgjedhur votimin fizik në ndonjërën nga këto 30 misione. Materialet zgjedhore janë dërguar në këto përfaqësi dhe ato janë gati për votuesit”, tha Elezi.
Sipas Elezit në kohën kur do të përfundojë votimi në përfaqësi diplomatike, do të përfundojë edhe votimi përmes postës, i cili ka nisur para më shumë se dy javë.
Më pas të gjitha votat e grumbulluara do të tërhiqen në Kosovë për t’u numëruar.
“Para ditës së zgjedhjeve në Kosovë, pra më 6 qershor, do të përfundojë edhe votimi jashtë vendit për rreth 104,488 votuesit e regjistruar për të votuar përmes postës, proces i cili ka nisur më 21 maj. Të gjithë këta votues, kanë pasur kohë 17 ditë që pakon me fletëvotim, të cilën e kanë pranuar nw adresw tw tyre nga KQZ, ta dërgojnë në ndonjërën nga kutitë postare të hapura në 23 shtete të ndryshme të botës, përfshirë dhe Kosovën. Fletëvotimet që i takojnë votimit në përfaqësi diplomatike dhe votimit me postë, do të tërhiqen dhe numërimi i tyre do të bëhet në Kosovë”, tha Elezi.
Sipas Elezit, është detyrim ligjor për KQZ-në që shtetasit e Kosovës të regjistruar për të votuar nga jashtë Kosovës, të largohen nga Lista e Votuesve brenda Kosovës e cila shpërndahet në vendvotime në ditën e zgjedhjeve.
Ndërkohë, të gjithë shtetasit e Kosovës, që jetojnë jashtë vendit dhe që nuk janë regjistruar për të votuar nga jashtë Kosovës, ndodhen në Listën e Votuesve brenda Kosovës dhe do të mund të votojnë në vendvotimin e tyre nëse ndodhen fizikisht në Kosovë, në ditën e zgjedhjeve.
Më 7 qershor qytetarët e Kosovës do tu drejtohen kutive të votimit për të zgjedhur legjislaturën e XI dhe qeverinë e re. Procesi i votimit do të zhvillohet në 949 Qendra të Votimit me gjithsej 2,550 vendvotime. Në 911 Qendra Votimi me 2,498 Vendvotime do të mundësohet votimi i rregullt, ndërkaq në 38 qendra të tjera, nga një për çdo komunë, me 52 vendvotime, do të mundësohet votimi me kusht. Numri i qytetarëve me të drejtë vote në vendvotime në Kosovë është 1 milionë e 959 mijë e 962 votues./KP
