Në Teatri i Qytetit “Bekim Fehmiu”, nesër, më 28 prill, duke filluar nga ora 20:00, shfaqet premiera e dramës “Pylli”, vepër e dramaturgut francez Florian Zeller, e cila sjell në skenë një dramë të thellë psikologjike mbi marrëdhëniet njerëzore dhe krizën identitare.
Shfaqja trajton historinë e Pierre, një personazh që përballet me një krizë të thellë personale, i ndarë mes jetës familjare, karrierës dhe dëshirave që rrezikojnë të shkatërrojnë ekuilibrin e tij. Teksa përpiqet të ruajë stabilitetin e jetës së ndërtuar, ai përfshihet në një rrjet kompleks marrëdhëniesh, dyshimesh dhe tradhtish, ku kufiri mes së vërtetës dhe iluzionit bëhet gjithnjë e më i paqartë.
Në këtë univers dramatik, realiteti fragmentohet dhe personazhet humbasin orientimin mes frikërave dhe dëshirave të tyre. Regjisori Erson Zymberi e sjell këtë vepër përmes një koncepti simbolik, ku “pylli” trajtohet si metaforë e mendjes njerëzore – një hapësirë ku individi mund të humbasë, por edhe të përballet me vetveten.
