UEFA ka publikuar vazot për kualifikime te Botërorit Katar 2022 dhe Kosova ka ngritje të vogël në këtë aspekt
Pas Ligës së Kombeve, Kosova do të fillojë nga marsi i vitit të ardhshëm që të luajë në kualifikime për Botërorin Katar 2022.
Derisa në kualifikimet e para, Kosova ishte në vazon e gjashtë në këto kualifikime kombëtarja kosovare do të jetë në vazon e pestë, pra ka pësuar rritje për një vazo.
Shqipëria në anën tjetër është në vazon katër për këto kualifikime.
Sipas “We Global Football”, Kosova për këto kualifikime do të jetë në një vazo me Armeninë, Qipron, Ishujt Faroe, Azerbejxhanin, Estoninë, Kazakistanin, Lituaninë, Letoninë dhe Andorrën. Kjo do të thotë se Kosova nuk do të mund të përballet me këto skuadra në kualifikime për Botëror, pasi që është në një vazo me to.
Në anë tjetër, vazon e parë për kualifikime në Botëror e kanë ruajtur: Belgjika, Franca, Anglia, Portugalia, Spanja, Italia, Kroacia, Danimarka, Gjermania dhe Holanda, por atë e ka humbur Zvicra që më nuk është në vazon e parë, por atë të dytën.
Bashkë me Zvicrën në vazon e dytë janë: Wales, Polonia, Suedia, Austria, Ukraina, Serbia, Turqia, Sllovakia dhe Rumunia.
Në vazon e tretë janë: Rusia, Hungaria, Republika e Irlandës, Republika Çeke, Norvegjia, Irlanda e Veriut, Islanda, Skocia, Greqia dhe Finlanda.
Në vazon e katër për këtë vit do të jetë Shqipëria e cila është në vazo me: Bosnjë Hercegovinën, Slloveninë, Malin e Zi, Maqedoninë, Bullgarinë, Izraelin, Bjellorusinë, Gjeorgjinë dhe Luksemburgun.
Në vazon e fundit, pra atë gjashtë, janë skuadrat e Maltës, Moldavisë, Lihtenshtajnit, Gjibraltarit dhe San Marinos.
Kujtojmë se shorti për kualifikimet e Botërorit Katar 2022 do të hedhet më 7 dhjetor, edhe pse ishte paraparë që të hedhet më 29 nëntor, por për shkak të pandemisë se koronavirusit është shtyrë për në dhjetor.
Kosova nuk do të mund të përballet me skuadrat nga vazo e pestë, por ajo nuk do të mund të përballet as me Kombëtaret e Rusisë, Serbisë dhe Bosnje Hercegovinës për shkak të problemeve politike që kanë këto shtete me njëra tjetrën.
