Një 26-vjeçar ka vdekur pas plagëve që i ka marrë nga një armë zjarri në fshatin Greikoc të Suharekës.Lajmin për KALLXO.com e ka konfirmuar zëdhënësi i Policisë për rajonin e Prizrenit, Vesel Gashi.Policia e ka cilësuar rastin si vdekje e dyshimtë, pasi afër shtëpisë së viktimës është gjetur një kallashnikov, që dyshohet se është përdorur në këtë rast.
“Pas marrjes së informatës, njësitë e Policisë kanë dalë në vendin e ngjarjes, në fshatin Greikoc të Suharekës dhe në një objekt përcjellës, 20 deri në 30 metra larg shtëpisë së viktimës, është gjetur një armë AK-47 e cila dyshohet se është përdorur në këtë rast”, ka thënë Gashi.
Gashi ka thënë se rreth orës 15:55, Policia ka pranuar një informatë nga Spitali Rajonal i Prizrenit se ka vdekur një pacient pasi kishte pasur plagë në trup.Në vendin e ngjarjes ka dalë edhe prokurori i shtetit dhe rasti është duke u trajtuar si “Vdekje e dyshimtë”.Gashi ka thënë se në vendin e ngjarjes kanë dalë njësitet relevante, të cilat po merren me detajet e rastit.
Me urdhër të prokurorit, trupi i pajetë i viktimës është dërguar në Institutin e Mjekësisë Ligjore.