Shefja e Grupit Parlamentar të Vetëvendosjes, Arbërie Nagavci, ka deklaruar se VV-ja do ta mbështesë ndryshimin e Ligjit për Dhomat e Specializuara.
Në fjalimin e saj në seancën e jashtëzakonshme të Kuvendit, Nagavci tha se çështja e Gjykatës Speciale do të duhej të trajtohej ndryshe që në vitin 2015, kur institucionet e Kosovës vendosën për themelimin e saj.
Ajo rikujtoi se Vetëvendosje kishte qenë kundër krijimit të Dhomave të Specializuara dhe tha se qëndrimi i tyre ndaj kësaj gjykate nuk ka ndryshuar.
