Ministri në detyrë i Financave, Hekuran Murati, i është kundërpërgjigjur kërkesës së presidentes, Vjosa Osmani, për pezullimin e tarifave ndaj produkteve me origjinë nga ShBA-të. Përmes një njoftimi ai ka njoftuar se kjo temë veçse ka qenë duke u shqyrtuar nga ana e qeverisë, dhe se do të njoftohen qytetarët sapo të merret një vendim konkret.
Sa i përket publikimit të kërkesës së Osmanit në rrjete sociale, Murati ka thënë se një shtet serioz këto çështje i trajton larg mediave.
“Sot pas orarit të rregullt të punës, në lajme lexova që Presidentja e vendit i paska bërë kërkesë Qeverisë që të pezullojë tarifat ndaj produkteve me origjinë nga ShBA-të. Kërkesa në email ishte dërguar në adresë të Qeverisë në 17:39, ndërkaq kjo gjë ishte bërë publike në rrjetin social X në 17:42, veç 3 minuta më vonë. Secili shtet serioz, këto çështje i trajton larg mediave, dhe publiku njoftohet kur të merret vendimi. Për më tepër, politikat fiskale bien në fushëveprimin e ekzekutivit, konkretisht ministrisë përgjegjëse për financa”, ka shkruar Murati.
Ministri tutje ka bërë të ditur se që nga viti 2023, në takimet e zhvilluara me përfaqësues amerikanë, është diskutuar vazhdimisht çështja e marrëveshjes për tregti të lirë me ShBA-të.
“Qysh në prill të vitit 2023, gjatë vizitës në ëashington DC, bashkë me zëvendës kryeministrin Bislimi kemi takuar përfaqësues të Departamentit të Tregtisë, me të cilët kemi diskutuar ndër tjera edhe temën e një marrëveshjeje për tregti të lirë me ShBA-të. Çështja e marrëveshjes për tregti të lirë është përsëritur nga Kryeministri Kurti edhe në takimet që ka zhvilluar me ish ambasadorin amerikan Hovenier. Gatishmëria jonë si qeveri dhe si shtet për të pasur tregti të lirë e pa asnjë barrierë tarifore apo jo-tarifore me Shtetet e Bashkuara të Amerikës, vazhdon të qëndrojë edhe më tej”, ka potencuar tutje Murati.
Ndërkaq, ai ka theksuar se impakti financiar i pasjes apo jo të një regjimi tarifor ka ndikim të vogël në ekonominë tonë.
“Gjatë ditës së djeshme, kemi diskutuar me Kryeministrin në lidhje me implikimet e mundshme që ka vendimi i Presidentit Trump për vendosjen e tarifave ndaj të gjitha shteteve me të cilat SHBA-të kanë raporte tregtare. Fatmirësisht, Kosova bën pjesë në grupin e shteteve që u është vendosur shkalla tarifore minimale prej 10%. Marrë parasysh edhe vëllimin e vogël tregtar që kemi, impakti financiar i pasjes apo jo të një regjimi tarifor ka ndikim të vogël në ekonominë tonë”, është shprehur ministri.
Në fund, ministri Murati ka bërë të ditur se e mbështesin plotësisht parimin e presidentit Trump për tregti të lirë, ndërsa ka thënë se kurdo që merret një vendim lidhur më këtë çështje, qytetarët do të njoftohen me kohë.
“Gjithsesi, si partnerë e aleatë të përhershëm, synimi ynë është që të rritet vëllimi i këmbimit tregtar, dhe e mbështesim plotësisht parimin e Presidentit Trump për tregti të lirë e pa barriera dhe fer. Kjo mund të arrihet përmes një marrëveshjeje për tregti të lirë, që do të shërbente edhe si një shkallë shtesë drejt ngritjes e forcimit të marrëdhënieve të forta që tashmë kemi. Shfrytëzoj rastin përmes këtij postimi që të njoftoj Presidenten, por edhe qytetarët, që si kabinet qeveritar ne veçse kemi qenë duke e shqyrtuar këtë temë. Dhe kurdo që merret një vendim patjetër që do t’ju njoftojmë me kohë”, përfundoi Murati.