Sekretari i Përgjithshëm i MPB-së, Genc Metaj, bashkë me zyrtarë të tjerë të MPB-së, kanë pritur sot në takim një delegacion nga Policia Kufitare dhe e Migracionit e Republikës së Shqipërisë, në kuadër të një vizite studimore që po zhvillojnë në vendin tonë.
Sipas MPB-së, takimi u përqendrua në prezantimin e përvojës së Republikës së Kosovës në menaxhimin e integruar të kufirit, duke përfshirë të arriturat kryesore, kornizën ligjore, si dhe proceset e ndërtimit dhe funksionalizimit të Qendrës Kombëtare për Menaxhim Kufitar.
Siç bëhet e ditur, në këtë takim, përfaqësuesit e Republikës së Kosovës ndanë me delegacionin shqiptar praktikat e tyre në koordinimin ndërinstitucional dhe përdorimin e kapaciteteve operacionale dhe teknologjike në fushën e menaxhimit të kufirit. Po ashtu, thuhet se u theksuan të arriturat e bashkëpunimit mes dy vendeve për një menaxhim dhe kontroll sa më efikas të kufijve, në përputhje me standardet e Bashkimit Evropian.
