Në Kroaci për sot është shpallur bojkot i supermarketeve, rrjeteve të shitjes me pakicë dhe pompave të benzinës për shkak të rritjes së vazhdueshme të çmimeve, bazuar në një nismë të nisur në Facebook, pas së cilës qëndron Qendra Evropiane e Konsumatorit.
Kjo nismë ka nisur si pasojë e çmimeve të larta të ushqimeve, transmeton gazeta online Reporteri.net.
Njerëzit janë të ftuar të mos blejnë asgjë në këtë ditë. Ky veprim, siç thuhet në komunikatën për media, ka për qëllim të vërë në dukje çmimet e larta të paqëndrueshme të produkteve ushqimore bazë dhe të inkurajojë ndryshime afatgjata nga të cilat do të përfitojnë të gjithë qytetarët e Kroacisë.
Federata e Shoqatave të Konsumatorëve të Kroacisë, thekson se janë të vetëdijshëm se shitësit po përpiqen të zhvlerësojnë iniciativën duke tërhequr konsumatorët me zbritje njëditore prej 20 për qind pikërisht në ditën e bojkotit. Lëvizje të tilla, siç thonë ata, “tregon një nënvlerësim të papranueshëm të inteligjencës dhe vendosmërisë së konsumatorëve”.
Ata u bënë thirrje qytetarëve që të qëndrojnë të bashkuar dhe të vendosur në mbështetjen e bojkotit, duke theksuar se tregtarët varen nga klientët dhe se veprimi i përbashkët ka fuqinë për të sjellë ndryshime reale. Ata gjithashtu ftuan të gjitha shoqatat për mbrojtjen e konsumatorëve, si dhe publikun e gjerë, që të kontribuojnë në suksesin e nismës së përmendur duke shkëmbyer informacione.
Kroacia është ndër tre vendet e BE-së me inflacionin më të lartë, pas Rumanisë (5.5 përqind) dhe Hungarisë (4.8 përqind). Norma vjetore e inflacionit në BE ishte 2.7 për qind në dhjetor të vitit të kaluar dhe 2.4 për qind në Eurozonë, sipas të dhënave më të fundit të Eurostat./Reporteri.net/