Lidhja Rajonale e Futbollit (LRF) në Prizren ka mbajtur Kuvendin e saj Zgjedhor, i cili ka përmbyllur procesin e zgjedhjeve për kryetarin e ri të organizatës. Në këtë Kuvend, i cili u zhvillua me pjesëmarrjen e 24 delegatëve, është rizgjedhur për një mandat katërvjeçar, z. Mirsad Çollaku, i cili ka marrë besimin e plotë të delegatëve të pranishëm.
Në këtë ngjarje të rëndësishme për zhvillimin e futbollit në rajon, ishte i pranishëm edhe Presidenti i Federatës së Futbollit të Kosovës (FFK), z. Agim Ademi, i cili i përshëndeti delegatët dhe uroi një Kuvend të mbarë. Ai theksoi se FFK do të vazhdojë të mbështesë Lidhjet Rajonale të Futbollit, duke investuar në përmirësimin e infrastrukturës dhe krijimin e kushteve optimale për zhvillimin e futbollit në të gjithë Kosovën.
Në datën 13 dhjetor, LRF Prizreni ka hapur publikisht procesin e zgjedhjeve, duke informuar të gjithë klubet dhe shoqatat përmes njoftimeve në faqen zyrtare dhe emailave. Gjatë periudhës së kandidaturave, vetëm z. Mirsad Çollaku ka shprehur interesin për të kandiduar për postin e kryetarit, dhe kandidatura e tij është miratuar nga Komisioni Zgjedhor i FFK-së.
Në Kuvendin Zgjedhor, ku nuk kishte kandidatura të tjera, Çollaku ka marrë mbështetje të plotë, duke u rizgjedhur me aklamacion nga të gjithë delegatët. Pas marrjes së besimit, ai falënderoi të gjithë delegatët dhe klube për angazhimin e tyre në zhvillimin e futbollit në rajon dhe premtoi se do të punojë edhe më shumë në avancimin e futbollit në Prizren me mbështetje të plotë nga FFK.
Kuvendi ka zgjedhur gjithashtu Bordin e ri të LRF-së, i cili përbëhet nga: Nënkryetari Sami Buqaj dhe anëtarët Bekim Bakaj, Denis Isaja, Festim Avdyli, Zymer Telaku dhe Drilon Berisha. Këta anëtarë të rinj janë propozuar nga klubet dhe shkollat e futbollit në rajon.
Drejtori i Drejtorisë për Kulturë, Rini dhe Sport (DKRS) në Prizren, z. Adem Morina, ka përshëndetur Kuvendin dhe ka uruar suksese të vazhdueshme për organet e reja të LRF-së.
Ky Kuvend dhe procesi zgjedhor përfaqësojnë një hap të rëndësishëm në zhvillimin e futbollit në rajonin e Prizrenit dhe shënojnë një fazë të re të angazhimit dhe përpjekjeve për të avancuar sportin më të popullarizuar në Kosovë.
- Reklama -