Kuvendi i Kosovës ka miratuar në lexim të parë Projektligjin për skemat pensionale të financuara nga shteti. Për këtë projektligj votuan 76 deputetë, përfshirë edhe nga dy partitë opozitare, LDK dhe AAK, megjithëse shprehën shqetësime se në këtë projektligj ka dispozita diskriminuese për punëtorët e viteve ‘90-ta që janë larguar nga puna në mënyrë të dhunshme.
Ndryshimet në të u bënë gati dy javë me vonesë prej afatit të përcaktuar nga Gjykata Kushtetuese që ligji të hyjë në fuqi më 15 korrik.
Ministri i Financave Hekuran Murati ka thënë se me ndryshimet në këtë ligj do të krijohet baza ligjore përmes së cilës, do t’u mundësohet marrja e pensionit kontributdhënës atyre qytetarëve që nuk e kanë përmbushur kriterin e përvojës së punës prej 15 vjetësh para janarit të vitit 1999.
Krahas kësaj, Kuvendi me mocion votoi që në orën 19:00 në seancë të jashtëzakonshme të shqyrtohet në lexim të dytë projektligji për plotësim-ndryshimin e skemave pensionale të financuara nga shteti.
