Dashuria për vendlindjen nuk njeh kufij – dhe këtë e dëshmon më së miri një grup mërgimtarësh nga fshati Brezne, të cilët jetojnë dhe punojnë në Zvicër. Të udhëhequr nga ndjenja e përgjegjësisë për komunitetin, ata kanë themeluar një organizatë joqeveritare me emrin “Liqeni Breznes”, me synimin për të dhënë kontribut konkret në përmirësimin e jetës në fshatin e tyre të origjinës.
Qëllimi kryesor i organizatës është mirëmbajtja, pastrimi dhe rregullimi i varrezave, rrugëve, liqenit dhe ambientit të fshatit në përgjithësi, si dhe përkrahja e banorëve rezidentë për një mirëqenie më të mirë.
Projekti i parë i realizuar nga kjo OJQ ishte pastrimi dhe sistemimi i varrezave të fshatit – një iniciativë që u mirëprit ngrohtësisht nga e gjithë mërgata. Pas këtij hapi të parë, shumë mërgimtarë u bashkuan me organizatën si anëtarë aktivë, me dëshirën për të kontribuar në mënyrë të rregullt për fshatin që mbajnë në zemër.
Për të forcuar bashkëpunimin dhe për të zbatuar më lehtë projektet në terren, është themeluar edhe një organizatë motër në vetë fshatin Brezne. Kjo strukturë lokale do të veprojë në koordinim të plotë me organizatën në Zvicër.
Organizata “Liqeni Breznes” udhëhiqet nga Sami Kryeziu (kryetar), Labinot Pirkuqi (arkëtar) dhe Munib Lecaj (sekretar), ndërsa dega në Kosovë është nën drejtimin e Erim Krasniqit. Ata u bëjnë thirrje të gjithë bashkatdhetarëve, kudo që ndodhen, të përkrahin këtë nismë përmes anëtarësimit dhe mbështetjes financiare, me qëllim që Brezna të shndërrohet në një fshat model në Kosovë.
Respekt dhe mirënjohje për secilin anëtar që kontribuon për të ardhmen e Breznes.
Për më shumë informata, vizitoni: Brezne.com /tvprizreni/
