Policia e Kosovës ka njoftuar se gjatë ditës së shtunë dhe të diel do të mbyllen disa rrugë në Kosovë, për shkak të mbajtjes së garës çiklistike, raporton teve1.info
Sipas njoftimit të Policisë, gjatë ditës së shtunë do të mbyllet Autostrada “Arbën Xhaferi”, duke filluar nga ora 13:30.
Ndërsa të dielën, mbyllja e rrugëve do të filloj në orën 10:30 si dhe do të përfshijë segment më të gjatë, duke filluar nga Lipjani për në Fushë-Kosovë dhe duke vazhduar deri në Malishevë.
“Më datë 15.07.2023, duke filluar nga ora 13:30, në segmentin Lipian-Bibaj (autostrada ‘Arbër Xhaferi’) do të fillojë pjesa e parë e kësaj gare.
Më datë 16.07.2023, itinerari i garës është më i gjatë (160 km), gara fillon në ora 10:30 me këtë itinerar të lëvizjes: Bibaj-Lipjan-Prishtinë, F.Kosovë (Bresje), pastaj rruga nacionale F.Kosovë-Aeroport-Komoran-Malishevë dhe anasjelltas”, thuhet në komunikatën e Policisë.
Gjatë kësaj kohe, më datën 15 dhe 16 korrik 2023, parashihet që të ketë bllokim të qarkullimit të automjeteve në autostradë (segmentet e lart-cekura) dhe riorientim në rrugë tjera alternative.
Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik rreth këtij bllokimi e riorientim të veturave në kohen sa do të jetë duke u zhvilluar gara e organizuar nga FÇK-ja. Andaj, qytetarët të planifikojnë me kohë qarkullimin në rrugë alternative në mënyrë që të mos krijohen tollovi e kolona të panevojshme.