Administrata Tatimore e Kosovës ka bërë të ditur se 344 biznese kanë aplikuar deri më tani për 917 punëtorë, për të përfituar nga masat 1.1, 1.2 dhe 1.3 të Pakos për Ringjallje Ekonomike.
Sipas një njoftimi të ATK-së, numri më i madh i punëtorëve që kanë aplikuar është për masën 1.3, mbështetja e punësimit të grave, përmes së cilës do të bëhet subvencionimi i pagës deri në 50% të pagës bruto për 3 muaj.
“Sipas statistikave vërehet se numri më i madh i punëtorëve që kanë aplikua është për masën 1.3 mbështetja e punësimit të grave, për të cilën do të bëhet subvencionim i pagës deri në 50% të pagës bruto mujore për 3 muaj, ndërsa pas përfundimit të periudhës tremujore subvencionohen kontributet pensionale për muajt e mbetur, konform kritereve dhe kufizimeve të përcaktuara me vendimin për zbatimin e masës 1.2 të Pakos së Ringjalljes Ekonomike të Ministrisë së Financave, Punës dhe Transfereve nr. 40/2021, të datës 29 korrik 2021”, thuhet në njoftimin e ATK-së.
Ndërsa, sa i përket masës 1.1 – për rikthimin në punë të atyre që kanë humbur vendin e punës gjatë pandemisë, do të bëhet subvencionim i pagës deri në 50% të pagës mujore bruto për 3 muaj (maximum deri në 170 € bruto), si dhe masa 1.2 mbështetja për të punësuarit e formalizuar, do të bëhet subvencionim i kontributit pensional në vlerë prej 10% të pagës bruto mujore për më së shumti 12 muaj, duke filluar nga muaji korrik 2021 deri në muajin qershor 2022.
Të drejtë aplikimi kanë shoqëritë tregtare të regjistruara dhe punëdhënësit sipas legjislacionit të Kosovës.
Aplikimi është i hapur deri më 15 tetor 2021 në ora 24:00.
Udhëzuesin për aplikim për subvencionim sipas masave të lartcekura, e gjeni në dritaren ku edhe bëhet kërkesa, si dhe në ueb-faqe të ATK-së ëëë.atk-ks.org në linkun Multimedia – Manuale & Prezantime.