Ministri i Punëve të Jashtme i Malit të Zi, Gjorgje Raduloviq, në një vizitë inauguruese ambasadores së re të Kosovës, Ariana Zherka-Hoxha, ia ka përmendur si të përfunduar çështjen e demarkacionit mes dy shteteve.

Në një njoftim të MPJ-së malazeze të martën, është theksuar se Raduloviq ka shprehur besimin që bashkëpunimi i hapur dhe intensiv mes dy shteteve do të vazhdojë edhe nën mandatin e Zherkës.

“Si shteti më i vogël në rajon, Mali i Zi është shumë i përkushtuar në bashkëpunim të mirë rajonal, stabilitet dhe paprekshmëri të kufijve të përcaktuar bashkë. Në këtë kuptim, kreu i diplomacisë malazeze vuri në pah shembullin e mirë të bashkëpunimit, të nënshkrimit të Marrëveshjes për kufijtë, në qershor të 2018-s, që me sukses kompletoi çështjen e demarkacionit mes Malit të Zi dhe Kosovës”, thuhet në përshkrimin që MPJ-ja e Malit të Zi ia ka bërë takimit Raduloviq-Zherka.

Demarkacioni mes Kosovës dhe Malit të Zi ka qenë temë e shumëdiskutueshme në Kosovë. Marrëveshja fillimisht ishte nënshkruar në vitin 2015, ndërsa nga opozita e asaj kohe u kundërshtua në Kuvend e edhe në sheshe me protesta të shumta. Më 2018 u ratifikua, bashkë me një aneks-marrëveshje ndërmjet dy presidentëve të shteteve. Marrëveshja shtesë përfshinte zotimin se të dyja vendet pas ratifikimit do ta rishikojnë vijën kufitare dhe do të bëhen korrigjime nëse ka pasur lëshime.

Demarkacioni u konsiderua edhe si kusht për liberalizimin e vizave.

Çështja e demarkacionit u ringjall javën e fundit pasi kryeministri i Kosovës, Albin Kurti, u shpreh se po pret qeverinë e re në Mal të Zi për ta diskutuar.