Presidenti i Francës, Emmanuel Macron, ka bërë thirrje për njohjen e Asociacionit të komunave me shumicë serbe në Kosovë, derisa ka shtuar se presidenti i Serbisë, Aleksandar Vuçiq, duhet t’i dënojë sulmet e 24 shtatorit.
Gjatë një konference për media me kryeministrin e Shqipërisë, Edi Rama, në Tiranë presidenti Macron ka thënë se dënimi i sulmit nga Vuçiqi kontribuon në rikthimin e qetësisë në veri.
“E dini që ne ndjekim me vigjilencë tensionet qe ekzistojnë mes Serbisë dhe Kosovës. Franca e Gjermania kanë bërë udhërrëfyes që është i mirë e presim të respektohet nga dy palët. Mendoj se është përgjegjësia e Vuçiqit të dënojë aktet e 24 shtatorit sepse kontribuon në rikthimin e qetësisë në veri”, ka deklaruar ai.
Sipas Macronit, autoritetet e Kosovës dhe të Serbisë duhet t’i riorganizojnë zgjedhjet në veri dhe të sigurohet pjesëmarrja e serbëve në zgjedhje.
“Presim nga autoritetet serbe e kosovare për riorganizim të zgjedhjeve, pjesëmarrjen e serbëve në këto zgjedhje, njohjen e asociacionit plotësisht dhe totalisht. Pres që Vuçiqi të jetë përgjegjës dhe pres të njëjtën gjë nga presidentja dhe kryeministri kosovar. E them me qartësi ju kemi besuar për vizat, çështja është pezulluar nga ana e Francës sepse ka të bëjë me respekt për fjalën e dhënë dhe fjala nuk po mbahet. Pres që palët të ecin përpara dhe është kushti i paqes në të gjithë zonën”, ka shtuar ai.
Klikoni KËTU për tu bërë pjesë e kanalit të TV Prizreni në Youtube.
