Lëvizja VETËVENDOSJE! në Prizren ka reaguar pas publikimit të operatorit përfitues nga shpallja publike e komunës së Prizrenit për ndarjen e vijave të transportit publik të udhëtarëve në komunikacionin urban për vitin 2024/2025. LVV në Prizren është shprehur se komuna e Prizrenit po manipulon me paranë publike, pasi sipas tyre, nga ky tender kanë përfituar miqtë e kryetarit, Shaqir Totaj.
“Keqpërdorimet dhe manipulimet në komunën e Prizrenit kanë marr përmasa drastike. Përveç keqqeverisjes dhe vjedhjes së parasë publike, kurdisja e tenderëve në dobi të dostave të Shaqir Totajt nuk ka të ndalur. Me rastin e shpalljes publike për ndarjen e vijave të transportit publik të udhëtarëve në komunikacionin urban për vitin 2024/2025, në njoftimin e Komisionit për Shqyrtimin e Ofertave të datës 14.08.2024, përfitues është shpallur operatori “EFA TOURISM LL.C.”. Në regjistrat e Agjencisë për Regjistrimin e Bizneseve, operatori “EFA TOURISM LL.C.” figuron të jetë themeluar me datën 22 prill 2024, në emrin e personit të quajtur Emin Altunç. Ajo çka është e habitshme është se numri kontaktues i biznesit në fjalë është i zv’kryesuesit të Kuvendit Komunal të Prizrenit Levent Buş. Levent Buş ndonëse është anëtarë i KDTP-së, është person i afërt me Shaqir Totajn dhe në Komitetin për Politikë dhe Financa përfaqëson PDK-në.”, thuhet në reagimin e LVV-së.
Tutje, në reagimin e LVV-së thuhet se “kompanitë e afërta me PDK-në, pas përfitimeve të shumta nga tenderë të ndryshëm, tani kanë filluar të themelojnë biznese të reja me qëllim të përfitimit të paligjshëm”. LVV në Prizren u ka bërë thirrje Prokurorisë për veprim të menjëhershëm duke nisur hetimet ndaj të gjithë personave të përfshirë në këtë “aferë korrupsioni”, sipas tyre.
“Përveç se kompanitë të afërta me PDK-në tash e disa vite përfitojnë tenderë të kurdisur, tani kanë filluar të themelojnë biznese të reja per t’i kurdisur tenderët në dobi të tyre, me qëllim të përfitimit të paligjshëm. Poashtu, me të dhënat që disponojmë nga sinjalizuesit e këtij skandali, autobusët nga kjo kompani janë sjellur në Prizren para se të shpallet fituesi dhe qëndrojnë në hapësirat e një kompanie private. Rrjedhimisht, Lëvizja VETËVENDOSJE! në Prizren i bënë thirrje Prokurorisë për veprim të menjëhershëm duke nisur hetimet ndaj të gjithë personave të përfshirë në këtë aferë korrupsioni.”, shkruajnë dega e LVV-së në Prizren në reagimin e tyre./TVPrizreni/
