Lista serbe bëri të ditur se vendimi antikushtetues për emërimin e Nenad Rashiqit ministër për Komunitete dhe Kthim në Qeverinë e Republikës së Kosovës, pa pëlqimin e deputetëve serbë, është shembulli më i mirë i veprimit autokratik, diktatorial, antikushtetues, ilegal të kryeministrit të Kosovës Albin Kurti.
Siç thuhet në njoftim, pas shkeljes së vazhdueshme të Marrëveshjes së Brukselit, Kurti edhe një herë ka treguar se nuk i respekton as aktet ligjore të Kosovës nëse janë në interes të popullit serb.
“Konkretisht, me këtë emërim, Albin Kurti ka shkelur nenin 96, paragrafin 5 të Kushtetutës, ku thuhet se për emërimin e një ministri nga radhët e popullit serb, i cili nuk është deputet, duhet të jetë pëlqimi i shumicës së deputetëve serbë. gjë që nuk e ka bërë Albin Kurti, e as Rashiq nuk e ka mbështetjen e deputetëve tanë”, thuhet në deklaratën e Listën Serbe.
Ata thonë se emërimi antikushtetues i Nenad Rashiqit është rezultat i veprimit të Kurtit për të pasur me vete serbët besnikë, të cilët do ta vënë interesin e tyre personal para atij kombëtar dhe që nuk kanë asnjë mbështetje nga populli serb në Kosovë.
Ata shtojnë se kundër “lëvizjes diktatoriale të Albin Kurtit, deputetët e Listës Serbe do të bëjnë ankesë në Gjykatën Kushtetuese, e cila do të duhet të konfirmojë pa vonesë se është shkelje e kushtetutës dhe shkelje e të drejtave të popullit serb”.
“Kjo tregoi se sa me rëndësi strategjike ishte verifikimi i mandateve të deputetëve të Listës Serbe në Kuvendin e Republikës së Kosovës, dhe mos lejimi i disa serbëve të Kurtit që të vendosin për interesat e popullit serb në vend të Listës Serbe. “, theksuan ata në deklaratë./FrontOnline/