Në kuadër të javës së 19-të të ligës së parë të Kosovës në futboll, skuadra e Lirisë së Prizrenit ka shënuar fitore para shikuesve të vet në “ Përparim Thaçi” me rezultat 2:1 kundër rivalit të vjetër KF “ Trepça” nga Mitrovica.
Pjesëloja e parë u përshkrua me matje forcash nga të dyja skuadrat, dhe rrjetat mbeten të paprekura.
Në pjesëlojën e dytë u zhvillua lojë shumë më interesante, ku të pranishmit panë 3 gola.
Të parët ne epërsi kaluan prizrenasit me një gol mjeshtëror të radhës nga sulmuesi, Liridon Fetahaj në minutën e 52- të takimit. Mysafirët nga Mitrovica ia dolen të barazojnë shifrat në minutën e 68-të përmes, Ardian Nezirit. Po, vendasit në kërkim të pikëve të plota nga ballafaqimi i sotëm sërish kaluan në epërsi përmes këmbëshpejtit nga Namibia, Prince Tijueze në minutën e 73-të të ndeshjes, që njëherit vulosi edhe epilogun përfundimtar të takimit.
Me këtë fitore, Liria sërish rënditet në pozitën e dytë të tabelës së klasifikimit, me 34 pikë të tubuara, 2 më shumë sesa Phoenix-i dhe 3 më pak se Feronikeli që kryeson renditjen, por që kanë nga një lojë më pak të zhvilluar.