Mijëra njerëz marshuan nëpër Stamboll të dielën pasi sindikatat denoncuan rritjen e varfërisë në vend dhe bënë thirrje për një rritje të pagës minimale.
Lira turke ka arritur nivelet rekorde më të ulëta kundrejt dollarit, duke humbur gati 30% në vlerë vetëm në muajin e fundit dhe mbi 43% që nga fillimi i vit. Inflacioni vjetor u rrit mbi 20%, duke shkatërruar fuqinë blerëse të turqve.
Erdogan, i cili ka shkarkuar tre guvernatorët e bankës qendrore që nga korriku 2019, ka refuzuar të pranojë çdo përgjegjësi për rënien e lirës.
“Unë kundërshtoj politikat që dënojnë popullin tonë me papunësi, uri dhe varfëri,” tha presidenti turk, duke paralajmëruar se vendi ishte në “luftë të pavarësisë ekonomike”.
Mbi gjysma e të gjitha depozitave në bankat turke janë në valuta të huaja, kryesisht në dollarë. Objektivi zyrtar i inflacionit të Turqisë është 5%, por me kokëfortësi ka mbetur dyshifror në dy vitet e fundit, afër 20% muajin e kaluar, shkruan Euronews.
Partitë opozitare thonë se inflacioni real është shumë më i lartë se sa tregojnë të dhënat zyrtare. Nisur nga situata, opozita ka bërë thirrje për zgjedhje të parakohshme përpara një votimi të planifikuar në qershor 2023, por Erdogan u zotua se “nuk do të ketë zgjedhje të parakohshme”.
Disa ekspertë kanë akuzuar Erdogan se kërkon ta bëjë Turqinë më tërheqëse si një qendër për prodhimin e lirë me paga turke që vlejnë më pak në terma dollarë. Paga minimale mujore neto e Turqisë prej 2 mijë e 825 e 90 lirash arriti në 380 dollarë (337 euro) në janar 2021, por që nga e mërkura e javës së kaluar ishte ekuivalente me 222 dollarë (197 euro).
