Qendra e LVV në Prizren përmes një komunikate publike, shkruan se ” Sot Lëvizjes Vetëvendosje ju bashkëngjitën edhe 300 anëtarë të rinj nga komuna e Prizrenit. Ata i priti Albin Kurti, Kryetar i Lëvizjes Vetëvendosje njëherësh kryeministër, me një ceremoni të mirëseardhje të organizuar në sheshin e Lidhjes Shqiptare të Prizrenit.
Kurti u shpreh falënderues për besimin që po i japin qytetarët gjithnjë e më shumë, dhe theksoi se këtë po e kthejnë në punë me vendosmëri për ndërtimin e shtetit dhe komunës. Ai i siguroi qytetarët e Prizrenit se do ta kenë vëmendjen e tij me investime si kryeministër i vendit, dhe me këtë rast i uroi për autostradën Prizren – Tetovë, e cila do të bëhet. Po ashtu edhe për shumë investime të tjera nga Qeveria në këtë komunë që po realizohen dhe që do të realizohen.
Ndërkaq, Artan Abrashi, Kryetar i Qendrës së Lëvizjes Vetëvendosje në Prizren, falënderoi anëtarët e rinj për bashkimin me Lëvizjen, si dhe kryeministrin Kurti për mbështetjen që po i jep komunës së Prizrenit në çdo aspekt. Ai theksoi se besimin që po i japin Lëvizjes qytetarët, është tregues se fitorja do të jetë madhështore si në zgjedhjet qendrore po ashtu edhe në ato lokale.
Me këtë rast, një fjalë e mbajti edhe deputeti Arbër Rexhaj, i cili theksoi se ata janë të vendosur për të zhvilluar shtetin dhe komunën e Prizrenit, sepse këtë e obligon mbështetja e madhe qytetare që po e gëzon Lëvizja Vetëvendosje, thuhet në komunikatën e Qendrës së kësaj partie në Prizren.
