Lidhja Demokratike e Kosovës ka thënë se vendit i sjellin dëme afatgjate dhe regres në arenën ndërkombëtare vendimet e serbëve të Kosovës për të ndalur punën në institucionet shtetërore.
Në njoftimin e lëshuar për media thuhet se Kosovës i duhet udhëheqje e matur që nuk bie në grackat destabilizuese të Serbisë.
“Por që synim ka integrimin e vazhdueshëm e të plotë të serbëve të Kosovës e që mjet të domosdoshëm ka koordinimin e ngushtë me aleatë ndërkombëtarë. Politikat populiste, me synim turmat partiake para interesave madhore nacionale, i sjellin Kosovës dëme afatgjate dhe regres në arenën ndërkombëtare”.
“LDK-ja i fton qytetarët në veri për qetësi, ndërsa institucionet e republikës për koordinim të ngushtë me ShBA-të dhe aleatët tjerë evropianë. Moskoordinimi me aleatët tanë ndërkombëtarë nga institucionet e Republikës së Kosovës, i nxitë dhe shërben agjendat destabilizuese e provokuese në territorin e Kosovës. Pasojat e një destabilizimi të tillë janë të pariparueshme për vendin”, thuhet në njoftim.
