Ky është i dyshuari për plagosjen e 41-vjeçarit në një lokal në Malishevë

Një incident i rëndë ka ndodhur të premtën në një lokal në fshatin Tërpezë të Malishevës, ku janë dëgjuar të shtëna nga arma e zjarrit. Për motive akoma të panjohura, një person ka gjuajtur me armë në drejtim të një personi tjetër, i cili për pasojë ka mbetur i plagosur, ndërsa i dyshuari është arrestuar nga Policia, raporton Gazeta Sinjali.

Sinjali mëson ekskluzivisht se i dyshuari në lidhje me këtë rast është 32-vjeçari Kushtrim Zekaj, i cili me vendim të Prokurorit është ndaluar për 48-orë.

Sipas informacioneve të para, i dyshuari ka dorëzuar në Polici një armë me gaz me shtatë fishekë dhe një gëzhojë fisheku me gaz, të cilat dyshohet se janë përdorur në rastin e plagosjes.

Në lidhje me këtë rast, Policia ka kryer bastisje edhe në shtëpinë e të dyshuarit, por nuk është gjetur asgjë e dyshimtë.

Ndërkaq, viktima rreth moshës 41-vjeçare, është dërguar për trajtim në Qendrën Klinike Universitare të Kosovës.

Policia dhe Prokuroria po vazhdojnë hetimet në lidhje me zbardhjen e detajeve të tjera, ndërsa rasti është cilësuar si “Vrasje në tentativë”.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

/GazetaSinjali/