Deputetët e Kuvendit të Kosovës do të mblidhen sot (e martë) në një seancë të jashtëzakonshme.
Seanca ka vetëm një pikë e rendit të ditës, çmimin dhe faturimin e energjisë elektrike për konsumatorët.
Sipas njoftimit, seanca pritet të nisë nga ora 11:00.
Prokuroria Themelore në Prishtinë ka nisur intervistimet në terren lidhur me skandalin e njehsorëve elektrikë. Kjo ka ardhur pas një hulumtimi që deputeti i Lidhjes Demokratike të Kosovës, Visar Azemi, ka thënë se e ka kryer me njehsorët në Prishtinë dhe Ferizaj, në mbi 80 për qind të rasteve ata nuk e kishin orën e saktë.
Ministria e Industrisë, Ndërmarrësisë, Tregtisë dhe Inovacionit ka njoftuar se nga inspektimet e para në terren ka gjetur se ka mospërputhje të kohës te njehsorët elektrikë.
Pas kësaj, Prokuroria në Prishtinë ka autorizuar Policinë për të nisur hetime lidhur me njehsorët e KEDS-it.
E në KEDS kanë mohuar çdo mundësi manipulimi, duke theksuar se matja e energjisë elektrike është e saktë. Sipas tyre, nëse konstatohet ndonjë devijim, qytetarët do të kompensohen.
Klikoni KËTU për tu bërë pjesë e kanalit të TV Prizreni në Youtube.
