Kuvendi i Kosovës ka filluar seancën e sotme me një minutë heshtje në nderim të heroit Afrim Bunjaku, i cili u vra në krye të detyrës më 24 shtator të këtij viti, si pasojë e një sulmi terrorist ndaj Policisë së Kosovës.
Kryeparlamentari, Glauk Konjufca ka ftuar të gjithë deputetët që të mbajnë një minutë heshtje në nderim të Bunjakut.
“Në emër të Kuvendit të Kosovës dhe të grupeve parlamentare, kërkoj të mbajmë një minutë heshtje për rënien e heroit tonë, Afrim Bunjaku, rënien e rreshterit të Policisë së Kosovës në detyrë” – deklaroi Konjufca.
Një sulm fillimisht me armatim të rëndë ishte kryer ndaj një patrulle kufitare rreth orës 3 të mëngjesit të së dielës. Një polic kufitar Afrim Bunjaku u vra nga ky sulm e një polic tjetër u plagos.
Pasi u mor informacioni për sulm ndaj policisë grupi terrorist u bart në Banjskë dhe u vendos në Manastirin e Banjskës. Për disa orë ata sulmuan policinë e më pas u arratisën.
Policia në bastisjet që ka kryer në shtëpi private përreth manastirit gjeti dhjetëra armatime.
Deri më tani të dhënat zyrtare flasin për 8 të arrestuar, përfshirë edhe pjesëtarë të grupit terrorist dhe 3 nga i njëjti grup të vrarë.