Kryetari i partisë boshnjake “VAKAT”, Rasim Demiri thotë se votën për Qeverinë Kurti 3 do ta japë vetëm nëse arrin marrëveshje me të në aspektin e përmbushjes së kërkesës së tij, që ai të jetë zëri qeveritar për boshnjakët në Kosovë e jo Duda Balje.
Demiri tha pë KALLXO.com se nëse është dikush që duhet t’i përfaqësojë boshnjakët është ai, e jo Duda Balje. Këtë e deklarim, Demiri e bëri pas informatave që ka marrë se kryeministri në detyrë, Albin Kurti, ka gjasa t’i ketë premtuar Baljes postin e ministres.
“Ne sot do të kemi një takim me kryeministrin Albin Kurti. Te shohim a do të kemi marrëveshje me të. Për boshjnakët në Kosovë është vetëm një emër, Rasim Demiri. Duda Balje nuk ka legjitimitet që t’i përfaqësojë boshnjakët”- tha Demiri për KALLXO.com.
Demiri tha se për kryeparlamentarin nëse propozohet sot në seancën konstituive voton pro, ndërsa për Qeverinë jo pa pasë një marrëveshje.
Në bazë të rezultateve të Zgjedhjeve të 9 shkurtit 2025 Lëvizja Vetëvendosje ka marrë 42.30% të votave – duke i siguruar 48 deputetët në Kuvend, Partia Demokratike e Kosovës ka marrë 20.95% të votave apo 24 deputetë, Lidhja Demokratike e Kosovës me 18.27% apo 20 deputetë dhe koalicioni AAK-NISMA 7.06% apo 8 deputetë. Lista Serbe do t’i ketë 9 deputetë, 1 ulëse nga komuniteti serb e ka fituar partia e Nenad Rashiqit.10 deputetët e tjerë do të jenë nga komunitetet e tjera joshumicë.