Kryeministri i Kosovës, Albin Kurti ka kujtuar Masakrën e Studimes së Vushtrrisë, sot kur bëhen 24 vite prej saj, dhe në të njëjtën ditë kur i pari i Qeverisë takohet në Bruksel me presidentin e Serbisë, Aleksander Vuçiq.
Kurti ka thënë se e kaluara jonë është “vendimtare për të ardhmen dhe të tashmen tonë”.
Ai thotë se gjaku i derdhur për liri nuk shlyhet, ashtu siç nuk mund të shlyhen edhe krimet e Serbisë në Kosovë.
“I bëj thirrje sistemit tonë të drejtësisë që të veprojë për ndriçimin e së vërtetës. Dënime për kriminelët e luftës dhe drejtësi për viktimat. Krimet e luftës nuk parashkruhen as vjetërsohen. Vuajtjet e popullit tonë janë të njoma përherë”, ka thënë Kurti.
Postimi i plotë i tij:
Nё ditёt e para tё muajit maj 1999, forcat serbe dogjën fshatrat e Vushtrrisё dhe dëbuan me dhunë banorët . I urdhëruan tё largohen drejt Shqipёrisё.
Më 2 maj të vitit 1999, në fshatin Studime të Vushtrrisë, forcat serbe nxorën nga kolona dhe i pushkatuan 116 civilë shqiptarë. Ekzekutuan fëmijë para syve të prindërve, vranë të rinj e pleq, e edhe gra shtatzëna. Familjes Gërxhaliu ia vranë 36 anëtarë, nga mosha 85 vjeç deri në 5 vjeç.
Në këtë 24 vjetor përkujtojmë martirët e Masakrës së Studimes së Vushtrrisë.
E kaluara jonë është vendimtare për të tashmen dhe të ardhmen tonë. Gjaku i derdhur për liri nuk shlyhet kurrë, siç nuk mund të shlyhen krimet e Serbisë në Kosovë.
I bëj thirrje sistemit tonë të drejtësisë që të veprojë për ndriçimin e së vërtetës. Dënime për kriminelët e luftës dhe drejtësi për viktimat. Krimet e luftës nuk parashkruhen as vjetërsohen. Vuajtjet e popullit tonë janë të njoma përherë.
I përjetshëm qoftë kujtimi për të gjithë martirët dhe dëshmorët e lirisë!.
Klikoni KËTU për tu bërë pjesë e kanalit të TV Prizreni në Youtube.
