Kryeministri i Kosovës, Albin Kurti ka marrë pjesë në hapjen e Seminarit të 17-të të Mësimdhënësve të Mërgatës.
Zyra e Kryeministrit ka njoftuar se Kurti në fjalën e tij ka theksuar rëndësinë e punës dhe përkushtimit të mësimdhënësve në mësimin e gjuhës amtare dhe të njohurive mbi kulturën tonë te fëmijët e diasporës.
Kurti është shprehur se gjuha shqipe është thelbësore për kombin tonë dhe tha se ajo nuk është thjesht mjet komunikimi mes nesh, por është koncentrimi i qenies shqiptare.
“Gjuha shqipe është thelbësore për kombin tonë. Ajo nuk është thjesht mjet komunikimi mes nesh, por është koncentrimi i qenies shqiptare. Shqipja i dallon shqiptarët si pjesë e botës dhe ata me gjuhën shqipe e ndërtojnë botën, kudo që janë. Prandaj, ju të dashur arsimtarë, jeni misionarët e gjuhës shqipe dhe të kulturës shqiptare në botë”, u shpreh ai.
Kryeministri gjithashtu ka vlerësuar rolin e mësimdhënësve të mërgatës, duke thëën se s’është më i pakët nga ai i rilindasve tanë para më shumë sesa një shekulli.
“Roli juaj sot nuk është më i pakët nga ai i rilindasve tanë para më shumë sesa një shekulli. Nëse rilindësit zhvilluan shkrimin shqip dhe hodhën farat dhe ndihmuan që të çelnin sythat e parë të kulturës sonë kombëtare në diasporën e atëhershme, dhe më pas e sollën atë që të lulëzonte në atdhe, ju me anë të veprimtarive, sikurse kjo e sotmja, përgatiteni më mirë për të përcjellë filiza të shqiptarisë në dhe të huaj që edhe aty të gjallojë kultura shqiptare, krahas kulturave vendase”.
“Ky është një proces dialektik, diasporë-atdhe-diasporë, që do të jetë shumë i rëndësishëm edhe gjatë shekullit tonë të globalizimeve, integrimeve politike dhe afirmimit të kulturave kombëtare”, është shprehur Kurti.