Kryeministri i Kosovës, Albin Kurti, ka reaguar pas fillimit të transferimit të mjeteve financiare në kuadër të Planit të Rritjes, duke theksuar përkushtimin e institucioneve për zbatimin e reformave dhe shfrytëzimin maksimal të mbështetjes nga Bashkimi Evropian.
Në një deklarim publik, Kurti bëri të ditur se pas ratifikimit të marrëveshjeve ndërmjet Kosovës dhe Komisionit Evropian, ka nisur transferimi i parafinancimit në vlerë prej 61.8 milionë euro.
Ai sqaroi se rreth 29 milionë euro janë transferuar si kredi direkte në buxhetin e shtetit, ndërsa pjesa tjetër, rreth 33 milionë euro, do të kanalizohet përmes Kornizës së Investimeve për Ballkanin Perëndimor (WBIF), duke përfshirë grante dhe kredi.
