Pas takimeve bilaterale me përfaqësues shtetërorë kroatë, Kryeministri i Republikës së Kosovës, Albin Kurti, u takua me biznesmenë të suksesshëm nga Kosova që operojnë në shtetet e rajonit, duke dëgjuar historitë e tyre të suksesit dhe përpjekjet për të arritur majat në fushat e tyre.
Një nga këta biznesmenë ishte Adem Saramati, nga Dobrushti i Prizrenit, një emër i njohur në botën e biznesit, i cili ka arritur sukses të jashtëzakonshëm veçanërisht në Slloveni dhe Kroaci. Saramati është një sipërmarrës i shquar dhe një humanist, kompania e tij ndërtimore, “Saramati”, ka një histori mbi 35-vjeçare në industrinë e ndërtimit.
Kompania e tij është e specializuar në ndërtimin e projekteve të mëdha, përfshirë apartamente luksoze, qendra tregtare dhe zyra moderne, duke përdorur teknologji të avancuar dhe standarde të larta evropiane të ndërtimit. Firma ka fituar reputacion për cilësinë e punës dhe përkushtimin ndaj inovacionit, duke e bërë atë një lider në fushën e ndërtimit.
