Kryeministri i Kosovës, Albin Kurti, ka përkujtuar figurat e Adem Demaçi dhe Astrit Dehari në përvjetorin e lindjes së tyre, duke i cilësuar si dy nga emrat më përfaqësues të përpjekjes së gjatë për liri, drejtësi dhe Republikën e Kosovës.
Përmes një shkrimi në facebook, Kurti theksoi se Adem Demaçi mbetet “emri më i shquar i përpjekjes së gjatë të popullit shqiptar” për organizim të gjerë në funksion të lirisë, bashkimit kombëtar dhe Kosovës Republikë. Sipas tij, veprimtaria dhe sakrifica e Demaçit përbëjnë një themel të rëndësishëm historik në rrugëtimin politik të vendit.
Duke u ndalur te figura e Astrit Deharit, kryeministri e cilësoi atë si “emrin më të dalluar ndër aktivistët e rinj” në vazhdim të së njëjtës përpjekje për Republikën e Kosovës, për emancipim shoqëror, barazi dhe përkujdesje për të gjithë qytetarët.
