KRU “Hidroregjioni Jugor” në Prizren ka njoftuar se ekipet e inspektoriatit të kompanisë po vazhdojnë me aksionin e shkyçjeve nga rrjeti i ujësjellësit për të gjithë konsumatorët me borxhe të pashlyera, pavarësisht njoftimeve të mëparshme dhe mundësive të ofruara për pagesë, sipas tyre.
Sipas KRU-së, vetëm gjatë ditës së djeshme janë realizuar 40 shkyçje për mospagesë, teksa shtojnë se nuk do të ketë më falje apo tolerim për asnjë konsumator që nuk i përmbush obligimet financiare.
Ndërkaq, sipas një njoftimit tjetër, gjatë javës së kaluar, ekipet e inspektoratit të kompanisë, kanë identifikuar dhe shkyçur nga rrjeti i ujësjellësit 35 lidhje ilegale nga konsumatorët e papërgjegjshëm:
- Prizren – 27 lidhje ilegale,
- Suharekë – 6 lidhje ilegale dhe
- Malishevë -2 lidhje ilegale.
“Aksioni për identifikimin e lidhjeve ilegale do të vazhdojë edhe në ditët në vijim. Ndaj të gjitha rasteve të evidentuara do të merren masat ligjore. Apelojmë tek të gjithë konsumatorët të respektojnë rregullat dhe të shmangin veprimet e jashtëligjshme, të cilat dëmtojnë furnizimin e drejtë dhe të rregullt me ujë për qytetarët tanë” – thuhet në njoftim.