Kryetari i Partisë Demokratike të Kosovës, Memli Krasniqi, ka thënë se me Shtetet e Bashkuara në krah, Kosova gjithmonë ka triumfuar mbi padrejtësitë dhe sfidat më të mëdha.
Në reagimin e tij lidhur me dëshminë e ish-zyrtarit të lartë amerikan, James Rubin, të hënën në Dhomat e Specializuara në Hagë, Krasniqi ka shtuar se ajo që e thotë Rubini është e bazuar në fakte të pakontestueshme dhe hedh poshtë të gjitha akuzat e Prokurorisë ndaj tyre.
“Jo rastësisht, populli ynë thotë: trimi i mirë me shokë shumë. Edhe sot, në një kohë kur bota ka nevojë për të vërtetën dhe historia për qartësi, në Hagë po dëshmon një mik i madh nga përtej Atlantikut. Kjo është një dëshmi e qartë, e bazuar në fakte të pakontestueshme, për drejtësinë e luftës sonë çlirimtare, për qëllimet e saj dhe përpjekjet e çlirimtarëve tanë për paqe e liri, duke hedhur poshtë të gjitha akuzat e Prokurorisë ndaj tyre. Prandaj, drejtësi dhe vetëm drejtësi, asgjë më shumë nuk kërkon sot asnjë shqiptar anembanë botës. Sepse me SHBA-të në krah, dhe assesi ndryshe, Kosova gjithmonë ka triumfuar mbi padrejtësitë dhe sfidat më të mëdha”, ka shkruar Krasniqi në Facebook.