Komisioni Qendror i Zgjedhjeve ka shpallur të shtunën rezultatet përfundimtare të raundit të parë për kryetarë të komunave në 35 komuna. Nuk janë shpallur rezultatet në Prishtinë, Junik e Mamushë për shkak se autoritetet po i trajtojnë ankesat ende.
Në Deçan nuk ka balotazh, Bashkim Ramosaj i AAK-së ka marrë 50.98 për qind të votave.
Në Gjakovë, në balotazh shkojnë Ardian Gjini i AAK-së dhe Ardian Gola i VV-së.
Në Drenas ka fituar pa balotazh Ramiz Lladrovci.
Gjilani do të ketë raund të dytë. Në garë janë Alban Hyseni i VV-së dhe Arbër Ismajli i LDK-së.
Balotazh do të ketë edhe Dragashi mes Bexhet Xheladinit të LDK-së dhe Shaban Shabanit të PDK-së.
Ilir Ferati i LDK-së ka fituar pa balotazh në Istog.
Sabedin Vishi i PDK-së dhe Jeton Raka i VV-së do të përballen në raundin e dytë në Kaçanik.
Në Klinë balotazhi do të mbahet mes Zenun Elezajt të AAK-së dhe Sokol Bashotës së PDK-së.
Valon Prebreza i VV-së dhe Besnik Osmani i LDK-së shkojnë në balotazh në Fushë-Kosovë.
Kamenicën e ka fituar edhe një mandat, Kadri Rahimaj i VV-së.
Në Mitrovicë balotazhi do të zhvillohet mes Faton Pecit të VV-së dhe Arian Tahirit të PDK-së.
Lista Serbe me Zoran Todiqin ka fituar në Leposaviq.
Ndërsa në Lipjan pa balotazh ka fituar Imri Ahmeti i LDK-së.
Në Novobërdë Sasha Millosheviq i Listës Serbe ka fituar pa balotazh.
Në Obiliq do të përballen Xhafer Gashi i LDK-së dhe Halil Thaçi i VV-së.
Balotazh do të ketë edhe në Rahovec, ku Smajl Latifi i AAK-së do të përballet me Ali Dulën e VV-së.
Peja është qendra tjetër e madhe që shkon në balotazh. Në garë janë Gazmend Muhaxheri i LDK-së dhe Taulant Kelmendi i VV-së.
Në Podujevë, Shpejtim Bulliqi i VV-së ka fituar pa balotazh.
Edhe Prizreni do të ketë përballje më 9 nëntor. Shaqir Totaj i PDK-së synon një mandat të ri. E rival do ta ketë Artan Abrashin e VV-së.
Sami Lushtaku është kthyer zyrtarisht në postin e kryetarit të Skenderajt. Kandidati i PDK-së ka fituar pa balotazh.
Pa balotazh ka fituar edhe Qemajl Aliu i VV-së në Shtime.
Ndërsa pa balotazh ka siguruar fitore edhe Ivica Tanasijeviq nga Lista Serbe në Shtërpcë.
Bali Muharremaj i AAK-së dhe Ardian Shala i LDK-së do të përballen në balotazh në Suharekë.
Ferizajn e ka fituar pa balotazh Agim Aliu i PDK-së.
Vitia do të mbajë edhe raundin e dytë. Në garë janë Sokol Haliti i LDK-së përballë Arsim Ademit të VV-së.
Në Vushtrri do të përballen Ferit Idrizi i PDK-së dhe Sylejman Meholli i VV-së. Lista Serbe ka fituar pa balotazh edhe në Mitrovicë të Veriut, Zubin-Potok, Zveçan, Graçanicë, Ranillug e Partesh.
E pa balotazh ka fituar edhe Nisma në Malishevë.
Balotazh do të ketë edhe në Kllokot mes Bozhidar Dejanoviqit të Listës Serbe dhe Sreçko Spasiq të Srpska Narodna Sloga. Anëtarët e VV-së në KQZ, Sami Kurteshi dhe Alban Krasniqi kanë votuar kundër shpalljes së rezultateve në disa komuna duke u ankuar në votë të asistuar në Kaçanik, Malishevë, Mamushë, Hani i Elezit, Zubin-Potok, Graçanicë, Ranillug, Kllokot, Partesh, Mitrovicë e Veriut, Leposaviq, Novobërdë e Zveçan.
Afati për ankesa për këto komuna është dy ditë.
Raundi i parë i zgjedhjeve u mbajt më 12 tetor. I dyti do të mbahet më 9 nëntor./koha.net/