Kryeministri i Kosovës, Albin Kurti, është shprehur i gatshëm të nënshkruajë marrëveshjet e Brukselit dhe të Ohrit, përfshirë edhe draftstatutin e Asociacionit të komunave me shumicë serbe, të prezantuar nga diplomatët-euroatlantikë javën e shkuar. Megjithatë, sërish nuk ka pasur nënshkrime të palëve, pasi siç ka thënë Qeveria e Kosovës në një komunikatë për media të enjten pas takimeve në Bruksel, një gjë e tillë është refuzuar nga Serbia. E presidenti i Serbisë, Aleksandar Vuçiq, ka thënë se “nuk bëhet fjalë për nënshkrim apo mosnënshkrime të ndonjë gjëje”, por për “zbatimin e asaj që është nënshkruar dikur, apo që është rënë dakord ndërkohë”, referuar propozimit ndërkombëtar për Asociacionin. Nga Bashkimi Evropian nuk ka pasur deklaratë pas takimeve.
Komunikata e Qeverisë së Kosovës ka theksuar se presidenti i Serbisë, Aleksandar Vuçiq ka refuzuar nënshkrimin e marrëveshjes dhe se ka kërkuar që t’i pranohet një letër anësore për t’i zhbërë tri parime të Marrëveshjes Bazë, Aneksit të Zbatimit dhe draftin e propozuar më 21 tetor.
“Kryeministri Kurti rikujtoi që ai ishte i gatshëm të nënshkruajë edhe në Bruksel më 27 shkurt 2023 edhe në Ohër më 18 mars 2023, edhe sonte, më 26 tetor 2023, duke theksuar që pikërisht Samiti i Këshillit Evropian në Bruksel është ngjarja e duhur, në vendin e duhur për nënshkrim të Marrëveshjes Bazike, përfshirë edhe draftin e ofruar nga BE-ja dhe ShBA-të për zbatimin e nenit 7 në ndërlidhje të nenit 10 të Marrëveshjes Bazike. Përkundër kësaj oferte gjeneroze të Kryeministrit Kurti, Presidenti i Serbisë, Vucic, ka refuzuar të nënshkruajë marrëveshje me Kosovën, dhe ka kërkuar që t’i pranohet një letër anësore me të cilën praktikisht i zhbën tri parime të Marrëveshjes Bazë, të Aneksit të Zbatimit si dhe të draftit të propozuar nga pesë emisarët me 21 tetor 2023”, thuhet në njoftimin e Qeverisë.
