Ministri i Punëve të Brendshme, Xhelal Sveçla, në një postim në Facebook, ka njoftuar se sot është bërë ndarja e dy kamionëve për Agjencinë e Menaxhimit të Emergjencave me të cilët zjarrfikësit do të kenë mundësinë e intervenimit në objekte të larta e distanca të mëdha.
“Këtë javë, me kënaqësi kam nënshkruar vendimin përmes së cilit i kam hapur udhë funksionalizimit të komponentës së kërkim shpëtimit brenda Agjencisë së Menaxhimit të Emergjencave. Sot, bashkë me Drejtorin e Agjencisë Genc Metaj, inauguruam objektin e kësaj qendre që ndodhet në Zubin Potok, buzë Liqenit të Ujmanit”, shkruan Sveçla në Facebook.
Ai tha se këtë objekt e kishin gjetur të pashfrytëzuar dhe me investimin e tij, që kap shifrën rreth 990 mijë euro, objekti është sanuar dhe do të jetë në shfrytëzim të kuadrove të AME-së që do të trajnohen e profilizohen në fushën e kërkim shpëtimit në ujë dhe mal.