Kryetari i Kuvendit të Kosovës, Glauk Konjufca, ka propozuar një zgjidhje, bazuar në interpretimet e zyrës ligjore të Kuvendit, rreth themelimit të komisionit hetimor për energjinë, të iniciuar nga Partia Demokratike e Kosovës.

Konjufca ka thënë në seancën e së enjtes se komisioni duhet të themelohet mirëpo, siç ka thënë, për ta zgjidhur këtë problem, pushteti duhet të heqë dorë prej diktimit të formulimit të çështjes, e opozita duhet ta rishqyrtojë mënyrën e propozimit, në mënyrë që ai grup parlamentar që dëshiron ta udhëheq këtë komision, të mos jetë i përfshirë në nënshkrime.

“Unë po distancohem sot prej të gjithë atyre deputeteve që kanë thënë që ky komision mund të mos themelohet, ky komision duhet të themelohet, por në procedurën e themelimit të tij e ka të brendashkruar edhe zgjedhjen e drejtuesit. Nuk mund të themi vetëm, po e themelojmë këtë, nëse nuk ka hapësirë ligjore për ta sqaruar se kush do të jetë drejtuesi. Zyra ligjore thotë se drejtues s’mund të jetë Driton Selmanaj, dhe asnjëri prej këtyre që e kanë nënshkruar dhe që i përkasin grupeve parlamentare. Për të gjitha këto arsye, rruga përpara mund të jetë vetëm një mënyrë: mazhoranca të heqë dorë prej kësaj që e dikton formulimin e çështjes, e opozita ta rishqyrtoj mundësinë e propozimit sa i përket lënies së lirë që ai grup parlamentar i cili dëshiron ta udhëheq këtë të mos jetë i përfshirë në nënshkrime. Po ju ftoj 3 minuta për një bisedë kryetarët e grupeve parlamentare”, ka thënë Konjufca.

Konjufca e ka quajtur të gabuar qasjen e shumicës e cila po kërkon ta diktojë interpretimin e formulimit të çështjes, por po ashtu e ka quajtur të gabuar edhe insistimin e opozitës, e cila kërkon që ta themelojë komisionin ashtu siç do vetë.

“Njëri gabim është i mazhorancës dhe gabimi është ky: unë nuk pajtohem që mazhoranca ka të drejtë ta diktojë interpretimin e çështjes për të cilën parashtrohet hetimi. Mazhoranca ka të drejtë ta shprehë atë, apo edhe të mos e hetojë por jam fort i bindur që mazhoranca nuk ka të drejtë ta diktojë formulimin e çështjes, Jam i bindur që kjo nuk i jep të drejtë opozitës që ta themelojnë çështjen si të duan”, është shprehur Konjufca.

PDK-ja ka marrë iniciativë për themelimin e një komisioni hetimor parlamentar për krizën energjetike, mirëpo partia në pushtet po synon një komision tjetër, ku do të përfshihej hetimi i gjendjes energjetike që nga paslufta.

Mosvotimi i propozimit të nismës së opozitës ka bërë që tri partitë opozitare, PDK, LDK e AAK të bojkotojnë punimet e Kuvendit deri tash.