Kryetari i Kuvendit të Republikës së Kosovës, Glauk Konjufca ka thënë se mërgata shqiptare mbetet një e rëndësishme dhe përcaktuese në të ardhmen e Kosovës po aq sa ishte edhe në të kaluarën.
Në kuadër të fjalës hyrëse në Konferencën “Diaspora Flet 2023”, Konjufca ka thënë se kontributi i mërgatës në Kosovë mbetet i vazhdueshëm.
“Ky kontribut i mërgatës tonë ka qenë konstant dhe vjen deri tek organizimi i luftës sonë çlirimtare në krye me UÇK-në, një përpjekje madhështore e cila në thelb kishte dy qëllime: arritjen e lirisë sonë dhe krijimin e një shteti të fuqishëm…mendoj që në masë të madhe është arritur në mënyrë të suksesshme e këtu sërish mërgata ka qenë vendimtare përmes kontrubutit të vet. Edhe në procesin tonë pas shpalljes së pavarësisë, këto 15 vite deri tash, le ta quajmë procesin e shtetndërtimit, unë konsideroj që mërgata është e pazëvendësueshme. Më lejoni të konstatoj se po aq sa ishte vendimtare në të kaluarën, po aq sa e përcaktoi të kaluarën tonë dhe arritjet tona deri këtu sot, mendoj që është po aq e rëndësishme dhe e përcaktueshme është edhe për të ardhmen”, ka deklaruar ai.
Kryeparlamentari Konjufca ka thënë se tashmë është nevoja për të hapur kapitullin e dytë të vendin e që në të përfshihen dy faza në relacion të ngushtë me mërgatën. Ajo e krijimit të mekanizmave për ruajtjen dhe mbrojtjen e identitetit kombëtar dhe mërgata si komponente ekonomike e vendit.
Ai vlerëson se është më se urgjente që të zhvillohen shkollat e organizuara posaçërisht për fëmijët e mërgimtarëve.
“Unë mendoj që është më se urgjente, dhe këtu mendoj jo vetëm si politikë të Republikës së Kosovës ku do duhej përfshirë edhe ajo e Shqipërisë sepse ne si popull ndajmë edhe të njëjtën gjuhë…është moment i fundit besoj unë, që të krijohen mekanizma vërtet të fuqishëm që me e realizu këtë projekt i cili është nacional. Të gjithë jemi të vetëdijshëm se si mundësohet…është padyshim edukimi dhe arsimi”, ka thënë ai gjersa ka theksuar se “fëmijët e mërgimtarëve të cilët kanë lindur dhe zhvilluar atje e që janë integruar besa shumë mire, kanë nevojë për shkollën e cila drejtpërdrejt organizohet nga Republika e Kosovës e të cilën me keqardhje e them e besa edhe me faj, nuk ka rritur të organizohet deri tash”.
