Njësitet Antikontrabandë të Doganës së Kosovës më 25.02.2025, kanë konfiskuar 207 lloje të ndryshme të barnave të cilat dyshohet se janë futur në treg në mënyrë të paligjshme.
Dogana përmes një komunikate për media tha se sasia e produkteve farmaceutike u gjet në një barnatore në Pejë.“Gjatë kontrollit, në një hapësirë të fshehur brenda objektit, janë gjetur produkte farmaceutike pa banderola, të cilat dyshohet se janë futur në treg në mënyrë të paligjshme. Si rezultat i këtij operacioni, janë konfiskuar 207 lloje të ndryshme të barnave, në një sasi totale prej 738 copë”- sqaroi Dogana e Kosovës.
Tutje Dogana fton qytetarët që ta raportojnë çdo aktivitet të dyshimtë.“Dogana e Kosovës vazhdon të jetë e përkushtuar në luftën kundër kontrabandës dhe në mbrojtjen e shëndetit publik, duke ndërmarrë masa të rrepta ndaj të gjithë atyre që shkelin ligjin dhe vënë në rrezik sigurinë e qytetarëve. Ftojmë qytetarët që të bashkëpunojnë me institucionet duke raportuar çdo aktivitet të dyshimtë përmes linjës së besimit 0800 50 095, e cila është pa pagesë dhe garanton anonimatin e raportuesve.” – thuhet mes tjerash në komunikatën e lëshuar më 26.02.2025.