Pas miratimit të rendit të ditës, Këshilli Prokurorial i Kosovës (KPK) i udhëhequr nga Ardian Hajdaraj, ka vijuar punimet e mbledhjes së sotme, të 273-tën me radhë.
Njësia për Komunikim Publik e Sekretariatit të KPK-së, përmes një komunikate për media, ka njoftuar se në këtë mbledhje, KPK shqyrtoi dhe miratoi raportin e Komisionit për avancim në Prokurorinë Speciale të Republikës së Kosovës, duke aprovuar avancimin e Armend Zenelajt në këtë prokurori nga data 16 shtator 2025. Po ashtu, Këshilli ka refuzuar kundërshtimin e paraqitur nga një kandidat.
Në vijim, bëhet e ditur se Këshilli ka diskutuar mbi vlerësimin paraprak lidhur me përfaqësimin shumetnik dhe gjinor në procesin e zgjedhjes së anëtarit të ri prokuror në KPK. Me këtë rast thuhet se është autorizuar Sekretariati i KPK-së për të informuar Këshillin në mënyrë të detajuar sa i përket përfaqësimit shumetnik dhe gjinor në funksion të respektimit të parimeve të barazisë, përfaqësimit të drejtë dhe përputhshmërisë me kornizën ligjore në fuqi.