Kompania Kosovare për Distribuim me Energji Elektrike në Kosovë (KEDS) ka nisur leximin e njehsorëve elektrikë të dorës me pajisjen e njohur si UNITECH.
Sipas KEDS-it, kjo është bërë me qëllim të avancimit të shërbimeve të leximit të njehsorëve elektrikë, teksa thuhet se pajisja UNITECH është pajisja më e re teknologjike e këtij lloji dhe se e zëvendëson pajisjen e vjetër, “Hand Held Unit”, që është në përdorim nga viti 2014.
“Përparësi e kësaj pajisjeje, në krahasim me pajisjen e vjetër, është futja e të dhënave shtesë në sistemin Android të saj, leximi i numrit të njehsorit përmes barkodit, përdorimi i kamerës, përdorimi i dy sim-kartelave 2G, 3G dhe 4G, si dhe printeri me Bluetooth i lidhur ndaras me të”, është shprehur Flamur Kurtaj, menaxher për lexim, faturim dhe ndërrim të njehsorëve në KEDS.
Tutje, në njoftim thuhet se veçori e kësaj pajisjeje është cilësia dhe shpejtësia për të lexuar njehsorët elektrikë.
“Në rast të ndonjë keqpërdorimi të mundshëm në njehsor, pajisja posedon edhe kamerën për fotografimin e njehsorit, për çka, në rast të tillë, lexuesi informon personat përkatës në KEDS”, është shprehur Milazim Avdiu, drejtor i Operimeve në KEDS.