Zëdhënësi i KEDS-it, Viktor Buzhala, njoftoi se çmimet e energjisë elektrike janë dyfishuar në berzat ndërkombëtare, duke shkuar në afro 500 euro për megavat.
Ai shkroi në Facebook të hënën se aktualisht Kosova ka shënuar devijim nga plani i prodhimit, për rreth 160 mgh/h minus.
“Vetëm energjia e munguar nga plani kushton 1.8 milionë euro në ditë në tregjet ndërkombëtare. Borë mundet me ra, ama ditë bash të bardha nuk po na presin”, shkroi Buzhala.
Tash e afro një vit, shumica e vendeve evropiane, përfshirë edhe Kosovën, janë përballur me krizë energjetike dhe shtrenjtim të energjisë elektrike.
Më 8 shkurt të këtij viti, Zyra e Rregullatorit për Energji (ZRRE) ka miratuar tarifa të reja të rrymës, sipas të cilave, të gjithë ata që konsumojnë më shumë se 800 kilovatë në muaj, do të paguajnë më shtrenjtë.
Për ata që nuk konsumojnë më shumë se 800 kilovatë, çmimi i rrymës nuk ndryshon, gjegjësisht do të vazhdojnë të paguajnë 7 centë për kilovat gjatë tarifave të shtrenjta dhe 3 centë gjatë tarifave të lira.
Tarifat e reja do të jenë të vlefshme deri më 31 mars, 2023.